മറ്റു പൂക്കള്ക്കൊന്നും ഇല്ലാത്ത ഔഷധ സിദ്ധിയാണ് ചെമ്പരത്തിപ്പൂവിനുള്ളത്. നൈട്രജന്, ഫോസ്ഫറസ്, ജീവകം ബി, സി, എന്നിവയാല് പൂക്കള് സമ്പന്നം. പല വിദേശ രാജ്യങ്ങളിലും ഇത് ഒരു ഗൃഹൗഷധമാണ്. ചെമ്പരത്തികള് പലവിധമുണ്ട്. മാല ചെമ്പരത്തി, അട്ടക ചെമ്പരത്തി, റോസ്, വെള്ള, ചുവപ്പ് നിറത്തിലുള്ള ചെമ്പരത്തി. എന്നാല് ചുവപ്പ് നിറമുള്ള ചെമ്പരത്തി പൂവിനാണ് ഔഷധ സിദ്ധിയുള്ളത്. ദേഹത്തുണ്ടാകുന്ന നീര്, ചുവന്ന തടിപ്പ് എന്നിവയകറ്റാന് പൂവ് അതേപടി ഉപയോഗിക്കുന്നു. ശ്വാസകോശ സംബന്ധമായ അസ്വസ്ഥതകള്ക്ക് പൂവില് നിന്ന് തയ്യാറാക്കുന്ന കഷായം അത്യുത്തമം.
ഹൃദയസംബന്ധമായ വൈശമ്യങ്ങള്ക്ക് ഒരു 'കാര്ഡിയാക്ക് ടോണിക്ക്' കൂടിയാണിത്. അഞ്ചാറ് പൂവിന്റെ ഇതളുകള് മാത്രമെടുത്ത് നൂറ് മില്ലി വെള്ളത്തില് തിളപ്പിക്കുക. നല്ല ചുവന്ന ദ്രാവകം കിട്ടും. ഇത് അരിച്ചെടുത്ത് തുല്യ അളവ് പാലും കൂട്ടിച്ചേര്ത്ത് ഏഴോ എട്ടോ ആഴ്ച സേവിച്ചാല് ഉന്മേഷം വീണ്ടെടുക്കാം. വിവിധതരം പനികള്ക്ക് ഈ ഔഷധം നല്ലതാണ്.
ഒരു പുഷ്പത്തിന്റെ എല്ലാ ഘടകങ്ങളും സമ്മേളിച്ചതിനാല് പൂക്കളുടെ വിവിധ ഭാഗങ്ങളെക്കുറിച്ച് പഠിക്കാനായി വിദ്യാര്ഥികള് മാതൃകയായി സ്വീകരിക്കുന്നത് ചെമ്പരത്തിയെയാണ്. ഏതു കാലാവസ്ഥയിലും ഈ പൂവ് കാണാറുണ്ട്.