മഞ്ഞള് കൂടിപ്പോയാല്
കറി വെക്കുമ്പോള് മഞ്ഞളിന്റെ അളവു കൂടിപ്പോയാല് വൃത്തിയുള്ള ഒരു വെള്ളത്തുണിയില് ചോറ് കിഴികെട്ടി കറിയിലിടുക. അധികമുള്ള മഞ്ഞള് ഈ കിഴി വലിച്ചെടുത്തോളും.
കാബേജിന്റെ ഗന്ധം മാറ്റാന്
കാബേജ് പാകം ചെയ്യുമ്പോള് ദുര്ഗന്ധം ഇല്ലാതിരിക്കാന് ഒരു ചെറിയ കഷ്ണം റൊട്ടി പൊടിച്ചു ചേര്ക്കുക. കുറച്ചു ചെറുനാരങ്ങ നീര് ചേര്ത്ത് കാബേജ് പാകം ചെയ്താലും ദുര്ഗന്ധം മാറ്റാന് സാധിക്കും.
പച്ചമുളക് സൂക്ഷിച്ചു വയ്ക്കാന്
പച്ചമുളക് കേടാകാതിരിക്കാന് അവയുടെ ഞെടുപ്പു നീക്കി കടലാസില് പൊതിഞ്ഞ് പ്ലാസ്റ്റിക് കവറിലാക്കി ഫ്രിഡ്ജില് വെക്കുക.
കറിവേപ്പില വാടാതിരിക്കാന്
ഒരു പാത്രത്തില് കുറച്ച് വെള്ളമെടുത്ത് അതില് കറിവേപ്പില ഞെട്ടുകളയാതെ വെച്ചാല് ദിവസങ്ങളോളം വാടാതിരിക്കും.
ഇഞ്ചി സൂക്ഷിച്ചുവെക്കാന്
അധികമുള്ള ഇഞ്ചിക്കഷ്ണങ്ങള് കേടുവരാതിരിക്കാന് മണ്ണിനടിയില് കുഴിച്ചിടുക. മാസങ്ങളോളം പുതുമ നഷ്ടപ്പെടാതിരിക്കാനുള്ള വഴിയാണിത്.
ചേന ചൊറിയാതിരിക്കാന്
പുളിവെള്ളത്തില് കഴുകി കറിവെച്ചാല് ചേന ചൊറിയുകയില്ല.
മിക്സിയിലെ ദുര്ഗന്ധം അകറ്റാന്
മിക്സിയുടെ ബൗളിനുള്ളിലെ ദുര്ഗന്ധം മാറാന് പൊതീനയിലയോ നാരങ്ങാ തൊലിയോ ഇട്ട് അടിക്കുക. ജാറിനുള്ളില് അല്പം എണ്ണ പുരട്ടിയ ശേഷം മസാലയും മറ്റും അടിച്ചാല് ബൗളിനുള്ളില് മസാല പറ്റിപ്പിടിച്ചിരിക്കില്ല.